ബര്‍ലിന്‍/പാരീസ്: ഫ്രാന്‍സില്‍ വിദ്യാര്‍ത്ഥി സമരങ്ങളും ജീവിതച്ചെലവിനെതിരായ പ്രക്ഷോഭങ്ങളും അതിരൂക്ഷമായ അക്രമങ്ങളിലേക്കും തീവെപ്പിലേക്കും വഴിമാറിയ പശ്ചാത്തലത്തില്‍, ഫ്രാന്‍സിലേക്ക് യാത്ര ചെയ്യുന്ന തങ്ങളുടെ പൗരന്മാര്‍ക്ക് ജര്‍മ്മന്‍ വിദേശകാര്യ മന്ത്രാലയം (Ausw�rtiges Amt) കര്‍ശന സുരക്ഷാ~യാത്രാ മുന്നറിയിപ്പ് നല്‍കി. അക്രമങ്ങള്‍ ഫ്രാന്‍സിന് പുറമെ മറ്റ് യൂറോപ്യന്‍ രാജ്യങ്ങളിലേക്കും, ജര്‍മ്മനിയിലെ സ്കൂള്‍ ക്യാമ്പസുകളിലേക്കും പടരുന്ന സാഹചര്യത്തില്‍, യൂറോപ്പിലുള്ള പ്രവാസികളും ഇന്ത്യന്‍ വിദ്യാര്‍ത്ഥികളും സന്ദര്‍ശകരും അതീവ ജാഗ്രത പാലിക്കണമെന്നും പ്രതിഷേധ മേഖലകളില്‍ നിന്ന് പൂര്‍ണ്ണമായി വിട്ടുനില്‍ക്കണമെന്നും മുന്നറിയിപ്പ് നല്‍കുന്നു.
ഫ്രാന്‍സില്‍ 'യുദ്ധസമാനമായ' അന്തരീക്ഷം; യാത്രാ മുന്നറിയിപ്പുമായി ജര്‍മ്മനി: ഫ്രഞ്ച് നഗരങ്ങളിലെ തെരുവുകള്‍ യുദ്ധക്കളത്തിന് സമാനമായ അവസ്ഥയിലാണെന്ന് പ്രാദേശിക ജനങ്ങള്‍ സാക്ഷ്യപ്പെടുത്തുന്നു. കത്തിയമര്‍ന്ന കാറുകളും തകര്‍ന്നടിഞ്ഞ കെട്ടിടങ്ങളും ചില്ലുകഷണങ്ങള്‍ ചിതറിയ റോഡുകളുമാണ് പലയിടത്തെയും കാഴ്ച. തലസ്ഥാനമായ പാരീസില്‍ മാത്രം 855 പേര്‍ അറസ്ററിലാവുകയും രാജ്യവ്യാപകമായി 5.5 ലക്ഷത്തിലധികം ആളുകള്‍ തെരുവില്‍ ഇറങ്ങുകയും ചെയ്തു. വരും ദിവസങ്ങളിലും കൂടുതല്‍ അക്രമങ്ങള്‍ക്കും റാലികള്‍ക്കും സാധ്യതയുള്ളതിനാല്‍ യാത്രക്കാര്‍ അതീവ വിവേകത്തോടെ പെരുമാറണമെന്നും ജനക്കൂട്ടങ്ങളില്‍ നിന്നും പ്രകടനങ്ങളില്‍ നിന്നും വിട്ടുനില്‍ക്കണമെന്നും ജര്‍മ്മന്‍ വിദേശകാര്യ മന്ത്രാലയം നിര്‍ദ്ദേശിച്ചു. പ്രാദേശിക പോലീസിന്റെയും സുരക്ഷാ സേനയുടെയും നിര്‍ദ്ദേശങ്ങള്‍ കര്‍ശനമായി പാലിക്കണം. അനുമതിയില്ലാത്തതോ അക്രമാസക്തമായതോ ആയ സമരങ്ങളില്‍ ഉള്‍പ്പെടുകയും, പിരിഞ്ഞുപോകാന്‍ പോലീസ് ആവശ്യപ്പെട്ടിട്ടും മാറാതിരിക്കുകയും ചെയ്യുന്നവര്‍ക്കെതിരെ കനത്ത പിഴയും നാശനഷ്ടങ്ങള്‍ക്കുള്ള നഷ്ടപരിഹാരവും ചുമത്തുമെന്നും ജര്‍മ്മന്‍ മന്ത്രാലയം വ്യക്തമാക്കി.
പ്രവാസികളും ഇന്ത്യന്‍ വിദ്യാര്‍ത്ഥികളും അതീവ ജാഗ്രത പാലിക്കണം: യൂറോപ്പിലെ വിവിധ സര്‍വ്വകലാശാലകളില്‍ പഠിക്കുന്ന ആയിരക്കണക്കിന് ഇന്ത്യന്‍ വിദ്യാര്‍ത്ഥികളും തൊഴിലെടുക്കുന്ന പ്രവാസികളും ഫ്രാന്‍സ് ഉള്‍പ്പെടെയുള്ള രാജ്യങ്ങളിലേക്ക് യാത്ര ചെയ്യുമ്പോഴും നിലവിലെ സാഹചര്യത്തില്‍ അതീവ മുന്‍കരുതലുകള്‍ സ്വീകരിക്കേണ്ടതുണ്ട്:
പ്രതിഷേധ കേന്ദ്രങ്ങള്‍ ഒഴിവാക്കുക: സ്കൂള്‍~വിദ്യാഭ്യാസ പ്രശ്നങ്ങളും ജീവിതച്ചെലവും ചൂണ്ടിക്കാട്ടി സോഷ്യല്‍ മീഡിയ വഴിയാണ് പലയിടത്തും ആഹ്വാനങ്ങള്‍ വരുന്നത്. പൊതു സ്ക്വയറുകള്‍, സര്‍വ്വകലാശാല~സ്കൂള്‍ പരിസരങ്ങള്‍, ട്രെയിന്‍ സ്റേറഷനുകള്‍ എന്നിവിടങ്ങളില്‍ നടക്കുന്ന അപ്രതീക്ഷിത ഒത്തുചേരലുകളില്‍ നിന്ന് പ്രവാസി വിദ്യാര്‍ത്ഥികള്‍ മാറിനില്‍ക്കണം.
കൗതുകത്തിന്റെ പേരില്‍ പോലും പോകരുത്: വിദേശ രാജ്യങ്ങളിലെ വിസ ചട്ടങ്ങള്‍ അതീവ കര്‍ശനമായതിനാല്‍, അക്രമാസക്തമായ പ്രകടനങ്ങള്‍ നടക്കുന്നിടത്ത് വെറുമൊരു കാഴ്ചക്കാരനായി നില്‍ക്കുന്നത് പോലും പോലീസ് നടപടികളിലേക്കോ വിസ പ്രശ്നങ്ങളിലേക്കോ വഴിതെളിച്ചേക്കാം.
യാത്രാ പ്ളാനുകള്‍ പുനഃപരിശോധിക്കുക: ഫ്രാന്‍സിലേക്ക് ടൂറിസ്ററ് ആവശ്യങ്ങള്‍ക്കോ മറ്റ് ആവശ്യങ്ങള്‍ക്കോ യാത്ര ചെയ്യാന്‍ ഒരുങ്ങുന്നവര്‍ നിലവിലെ സുരക്ഷാ സാഹചര്യങ്ങള്‍ വിലയിരുത്തി മാത്രം യാത്രകള്‍ ക്രമീകരിക്കുക.
പ്രതിഷേധം ജര്‍മ്മനിയിലേക്കും മറ്റ് യൂറോപ്യന്‍ രാജ്യങ്ങളിലേക്കും: ഫ്രാന്‍സിലും ബെല്‍ജിയത്തിലും പൊട്ടിപ്പുറപ്പെട്ട സമരം ഇപ്പോള്‍ ഇറ്റലി, ഗ്രീസ്, അയര്‍ലന്‍ഡ്, അല്‍ബേനിയ, ഓസ്ട്രിയ, ജര്‍മ്മനി എന്നീ രാജ്യങ്ങളിലേക്കും പടരുകയാണ്. അല്‍ബേനിയയില്‍ വിദ്യാഭ്യാസ മന്ത്രാലയത്തിന് മുന്നില്‍ സ്ഫോടക വസ്തുക്കള്‍ എറിഞ്ഞ് പ്രക്ഷോഭം നടന്നു. ജര്‍മ്മനിയില്‍ രാജ്യവ്യാപകമായി വലിയ സംഘര്‍ഷങ്ങള്‍ ഉണ്ടായിട്ടില്ലെങ്കിലും, വാരാന്ത്യത്തില്‍ ബെര്‍ലിനിലെ നിരവധി സ്കൂളുകള്‍ വിദ്യാര്‍ത്ഥികള്‍ ഉപരോധിച്ചു.
വിദ്യാഭ്യാസ മേഖലയ്ക്ക് കൂടുതല്‍ ഫണ്ട് അനുവദിക്കണമെന്നും നിര്‍ബന്ധിത സൈനിക സേവന നീക്കങ്ങള്‍ ഉപേക്ഷിക്കണമെന്നും ആവശ്യപ്പെട്ട് ബെര്‍ലിന്‍ ഫ്രീഡ്രിഷ്സ്ഹൈനിലെ (Friedrichshain) ആന്‍ഡ്രിയാസ് ജിംനേഷ്യം, ക്രൂസ്ബര്‍ഗിലെ (Kreuzberg) ലൈബ്നിറ്റ്സ് ജിംനേഷ്യം എന്നിവയുടെ പ്രവേശന കവാടങ്ങള്‍ വിദ്യാര്‍ത്ഥികള്‍ തടഞ്ഞു. ഫ്രീഡ്രിഷ്സ്ഹൈനില്‍ മാത്രം 150~ലധികം പോലീസ് ഉദ്യോഗസ്ഥരെയാണ് സുരക്ഷയ്ക്കായി വിന്യസിച്ചത്. ബെര്‍ലിനിലെ ഫ്രഞ്ച് ജിംനേഷ്യത്തിലെ 150~ഓളം വിദ്യാര്‍ത്ഥികളും ഫ്രാന്‍സിലെ സമരത്തിന് ഐക്യദാര്‍ഢ്യം പ്രഖ്യാപിച്ച് ബാരിക്കേഡുകള്‍ തീര്‍ത്തു.
ജര്‍മ്മന്‍ സ്കൂളുകളിലെ പ്രതിസന്ധികളും ആശങ്കകളും: ജര്‍മ്മനിയിലെ സ്കൂളുകളും കടുത്ത പ്രതിസന്ധിയിലാണ് കടന്നുപോകുന്നതെന്ന് അധികൃതര്‍ ചൂണ്ടിക്കാണിക്കുന്നു. ഫണ്ടിന്റെ കുറവ്, കടുത്ത അധ്യാപക ക്ഷാമം, തകരാറിലായ തപീകരണ സംവിധാനങ്ങള്‍ (Heating) കാരണം ശൈത്യകാലത്ത് തണുത്തുവിറച്ച് ക്ളാസിലിരിക്കേണ്ടി വരുന്ന സാഹചര്യം എന്നിവയെല്ലാം ജര്‍മ്മനിയിലെ വിദ്യാഭ്യാസ മേഖലയിലും അമര്‍ഷം പുകയ്ക്കുന്നുണ്ട്. ഈ സാഹചര്യങ്ങള്‍ മുതലെടുത്ത് അക്രമങ്ങള്‍ അഴിച്ചുവിടാന്‍ ചില തീവ്ര ഗ്രൂപ്പുകള്‍ ശ്രമിച്ചേക്കാമെന്നതിനാല്‍, ജര്‍മ്മനിയിലെ മലയാളി കുടുംബങ്ങളും വിദ്യാര്‍ത്ഥികളും തെറ്റായ പ്രചാരണങ്ങളില്‍ വീഴാതെ അതീവ ജാഗ്രത പുലര്‍ത്തണമെന്ന് പ്രവാസി കൂട്ടായ്മകളും നിര്‍ദ്ദേശിക്കുന്നു.
Comments: